प. पू. श्री स्वामी गगनगिरी महाराज अखंड हरिनाम सप्ताह सोहळा २०२६ अंतर्गत सुरू असलेल्या रामराव महाराज ढोक रामकथा संदेशाने हजारो भाविकांच्या मनावर अमिट छाप पाडली. रामायणाचार्य ह. भ. प. रामराव महाराज ढोक यांनी सीता स्वयंवर आणि श्रीराम-सीता विवाह प्रसंगाचे अत्यंत प्रभावी, रसाळ आणि हृदयस्पर्शी निरूपण करत भारतीय संस्कृतीतील विवाहसंस्कारांचे महत्त्व अधोरेखित केले.
या प्रसंगी त्यांनी “मुलीचा पिता हा कधीच वानशूर नसतो, तो दानशूर असतो” हा विचार मांडत कन्यादानाचे पावित्र्य, पालकांचा त्याग, कुटुंबव्यवस्थेतील जबाबदाऱ्या आणि संस्कारांचे अनन्यसाधारण महत्त्व स्पष्ट केले. श्रीराम चरित्रातील आदर्श आणि आजच्या समाजातील वास्तव यांची सुंदर सांगड घालत त्यांनी उपस्थित भाविकांना आत्मचिंतन, नैतिकता आणि कुटुंबमूल्ये जपण्याचा संदेश दिला.
रामकथेतील हा प्रेरणादायी संदेश इतका प्रभावी ठरला की विविध वृत्तपत्रांनीही त्याची विशेष दखल घेतली. त्यांच्या विचारांनी समाजात सकारात्मक परिवर्तन घडविण्याची प्रेरणा दिली. या दिवशी हजारो भाविकांनी श्रीराम कथेचा लाभ घेतला तसेच प्रेमभावाने आयोजित करण्यात आलेल्या खिचडी महाप्रसादाचा आस्वाद घेत भक्ती, सेवा आणि आध्यात्मिक समाधानाचा दिव्य अनुभव घेतला. संपूर्ण सप्ताहस्थळ जय श्रीराम आणि हरिनामाच्या गजराने भक्तिमय झाले होते.